Bandari kufungua fursa zaidi za Uchumi

Imewekwa: May 16th, 2018

Mkuu wa Wilaya ya Musoma Dr. Vincent Naano ameliambia baraza la madiwani kuwa ujenzi wa Bandari ya Musoma utaanza Mwezi Julai na kuongeza kuwa tayari zabuni ya ujenzi imekwisha tangazwa .

Katika hotuba yake aliyoitoa wakati wa mkutano wa baraza la madiwani lililofanyika jana Dr. Naano aliutaka uongozi wa Manispaa ya Musoma kuhakikisha biashara zote zilizokuwa zinafanyika katika eneo hilo la Bandari zinatafutiwa eneo jingine ikiwa ni pamoja na kuandaa miundo mbinu rafiki kwa wafanya biashara hao.

“Ni vyema sasa Halmashauri ikaanda mpango wa kuwapeleka wafanya biashara wa kuku katika soko la Kamunyonge ili kupisha eneo la Bandari” Alisema Dr. Naano na kuongeza kuwa “Suala la ujenzi wa Bandari halina mjadala tena vi vyema mjipange kuona namna ya kuboresha masoko mengine ili wafanya biashara watakaoondoka eneo la Bandari wapate mahali salama pa biashara zao.”

Dr. Naano aliongeza kuwa serikali ya awamu ya tano imekuwa mstari wa mbele katika kujenga miundo mbinu ya kiuchumi ili kuwawezesha wananchi kuongeza kipato chao na kuiongezea serikali mapato.

Fursa zinazotarajiwa baada ya ukamilishaji wa ujenzi wa Bandari ni pamoja na ajira mpya, ukuaji wa biashara na ongezeko la fursa za masoko zitakazotokana na mwingiliano wa wafanyabiashara na wananchi katika jumuiya ya Afrika Mashariki.

Hata hivyo Dr. Naano ameonya tabia ya baadhi ya watendaji wa Halmashauri kutochukua hatua za haraka katika utatuzi wa kero mbalimbali za wananchi na kusababisha serikali kulaumiwa.

“Tunataka kuona hatua za haraka na za makusudi ili azma ya kuwaletea wananchi maendeleo ionekane kwa vitendo, fursa zitakazoletwa na bandari nani anataka  kuzikosa?.” Alisema Dr. Naano.

Bandari ya Musoma ni kati ya Bandari za kimkakati katika ukanda wa Afrika Mashariki na kukamilika kwake kutafungua mawasiliano kwa nchi za Uganda na Kenya,