Magufuli aitangaza Mara kama mkoa wa ukombozi

Imewekwa: September 5th, 2018

Magufuli aitangaza  Mara kama mkoa wa Ukombozi

Rais Magufuli  awataka watendaji wa serikali na wananchi wa mkoa wa Mara kuutazama mkoa wa Mara kama mkoa wa ukombozi.

Akizungumza na wananchi pamoja na viongozi mbalimbali katika viwanja vya shule ya Msingi Mukendo  Manispaa ya Musoma,Rais Magufuli ameahidi kutoutupa Mkoa wa Mara.

“Mkoa wa Mara ni Mkoa  maalum” amesema Rais Magufuli ”lazima tuuenzi Mkoa huu kwa sababu ni Mkoa   wa Ukombozi” ameendelea kusisitiza Rais Magufuli.

Rais Magufuli amesema kwamba kuna watu wameshasahau alichofanya Baba wa Taifa Mwl J.K, Nyerere katika ukombozi wa nchi hii.

 “sisi Watanzani hatujivunii vitu vyetu vizuri ,hata sisi Viongozi tulionufaika na Taifa hili tumesahau yote hayo” alisema Rais Magufuli .

Hata hivyo, Rais amewataka viongozi kuendeleza mipango ya Baba wa Taifa kwa kuboresha shughuli za maendeleo na kuwaasa Viongozi kutekeleza majukumu yao kwa ukamilifu na tija.

“Yote aliyoanzisha baba wa Taifa ni mawazo matakatifu na yaendelezwe, viwanda vyote alivyoanzisha lazima vifufuliwe” na kuongeza “Tukiwa na viwanda matatizo mengi yatatatuliwa ikiwa pamoja na ajira kwa vijana”. Alisema Rais.

Miongoni mwa mipango hiyo ni matumizi ya usafiri wa Meli katika ziwa victori,kufufua kiwanda cha Mutex na viwanda vingine vilivyokufa,pamoja na uboreshaji wa kiwanja cha ndege.

Hivyo katika  kutambua umuhimu wa mkoa huu wa kihistoria pamoja na mambo mengine Rais Magufuli amewajuza   wananchi kuwa serikali imetenga billioni 2 mwaka huu wa fedha kwa ajili ya kumalizia ujenzi wa hospitali ya rufaa ya Kwangwa ambayo ujenzi wake umechukuwa muda mrefu.

Rais pia ametaka hatua stahiki zichukuliwe kwa mwekezaji wa hotel ya Musoma hotel ikiwa ni pamoja na kunyang’anywa kwa kuwa ameshindwa kuiendeleza kwa zaidi ya miaka kumi na kuifanya kuendelea kuchakaa.

Rais pia amemwagiza waziri wa ujenzi na uchukuzi Isaack Kamwene kuhakikisha ujenzi wa barabara ya Musoma Busekela inaanza kujengwa ikiwa ni moja ya ahadi alizozitoa wakati akiomba ridhaa ya kuchaguliwa kuwa rais wa Tanzania.

Ziara ya Rais itaendelea kesho ambapo atatembelea wilaya ya Butiama na Serengeti.