Uhifadhi wa Mazingira

Imewekwa: August 31st, 2018

Mlima Mukendo Mbioni Kuwa Eneo Lindwa

Waziri wa nchi, ofisi ya makamu wa Rais Muungano na Mazingira Mhe. Januari Makamba ameridhia ombi la Halmashauri ya Manispaa ya Musoma kuufanya mlima Mukendo kuwa eneo lindwa.

Mlima Mukendo unaopatikana katika Mtaa wa Nyerere Kata ya Mukendo Una eneo la mita za mraba 101,974 sawa na ekari 25 au hekari 10. Mlima huu uko umbali wa takribani km 1 kutoka kituo cha mabasi cha mjini.

Awali akisoma taarifa ya uhifadhi wa mlima Mukendo kwa niaba ya Mkurugenzi wa Manispaa Mkuu wa idara ya Mazingira na Uthibiti wa taka ngumu Bw. Dotto Tambuko alieleza sababu zilizopelekea kutaka mlima huo kutangazwa kama eneo lindwa ni uwepo wa uoto wa asili ambao unasaidia kurekebisha hali ya hewa ya Musoma.

Aliongeza kuwa Mlima huu una wanyama wengi hasa wanyama wadogo wadogo na ndege ambao wako katika hatari kubwa ya kuharibiwa kutokana na shughuli za binadamu za kiuchumi na kijamii.

Sababu nyingine ni kama Mimea ya Mlima Mukendo inaondolewa kwa kasi kubwa kuliko inavyorudishiwa, Kuna shughuli zingine za matumizi ya ardhi kwenye eneo hilo inayoweza kusababisha uharibifu wa mazingira pamoja na Mlima Mukendo ukihifadhiwa unaweza kuwa moja ya vivutio muhimu kwa watalii (ecotourism).

Mstahiki Meya wa Manispaa ya Musoma Mhe. William Gumbo akimkaribisha waziri  Makamba kutoa hatuba alitoa ombi maalum kwa waziri kuwa hatua zote za utangazaji wa eneo hilo zisiathiri hali ya sasa ya mlima ikiwa ni pamoja na taasisi pamoja na miundombinu iliyopo kwa kuwa ina historia ya pekee ya mlima huo.

Kwa upande wake Waziri Makamba alipongeza jitihada ambazo zimekuwa zikifanywa na Manispaa katika uhifadhi wa mlima Mukendo na kutaka jitihada hizo kuungwa mkono na wapenda mazingira na wananchi wote kwa ujumla.

“Mnafanya kazi ya kuitunza hadhi na heshima ya Musoma kwa kutunza mazingira” alisema Makamba  na kuongeza kuwa “Sisi kama wizara tunandaa masharti ya uhifadhi wa mlima Mukendo na matumizi ya mlima” .Alisisitiza.

Makamba alisifia mandhari ya mlima na kusema ” Mji wa musoma umejaliwa kuwa na ziwa hivyo kuufanya kuwa maalum hasa ukingatia mandhari nzuri ya mlima huu tuliopo. Ukiwa hapa unauona mji wote wa musoma pamoja na ziwa Victoria’’. Alisema.

Akitoa shukrani kwa waziri Makamba mkuu wa wilaya ya Musoma Mhe. Vicent Naano alisema Wilaya ya Musoma imejipanga ipasavyo kutunza na kulinda mazingira kwa kupanda miti Mil. 10 ndani ya miaka 5.

Mlima Mukendo upo katika hatua za mwisho za kutangazwa kama eneo lindwa kutokana na kukidhi vigezo vilivyowekwa na serikali ili eneo litangazwe kama eneo maalum linalohitaji kuhifadhiwa na kulindwa.