Uzinduzi wa Baraza la Madiwani

Imewekwa: December 14th, 2020

Uzinduzi wa Baraza la Madiwani wafanyika kwa Amani 

Baraza la Madiwani Manispaa ya Musoma limezinduliwa huku viongozi mbalimbali waliohudhuria hafla hiyo wakitoa maelekezo mahsusi kuhusu utekelezaji wa shughuli za serikali na wajibu wa madiwani katika usimamizi wa shughuli hizo.

Mapema akizindua mkutano maalum wa uzinduzi wa baraza katibu tawala wa Wilaya ndugu Justine Manko amewaasa madiwani wapya kuwa wajibu ulioko mbele yao ni kuhakikisha Halmashauri inasonga mbele kwa kusimamia uwajibikaji na huduma za Wananchi.

“Baraza la madiwani lina kazi kubwa mbele yake kuhakikisha linasiamia shughuli zote hasa ujenzi wa vyumba vya madarasa” Alisema.

Aliongeza kuwa vyumba vya madarasa vinavyohitajika ni 23 kwa shule za sekondari.

“Meya atakayechaguliwa leo ahakikishe kuwa maendeleo yanakwenda Kata zote bila kuwepo na ubaguzi” Alisisitiza.

Kwa upande wake Mkuu wa Wilaya ya Musoma Mhe. Vincent Naano alisisitiza kuwa utekelezaji wa ilani ya Chama Cha Mapinduzi ni jambo la kufa na kupona huku akifafanua kuwa ilani ni mkataba kati ya Wananchi na Madiwani waliochaguliwa.

“ Kasimamieni kwa dhati huduma za Wananchi kama afya, Elimu na shughuli za kiuchumi kama ujasiriamali”. Alisema Mhe. Naano

Aidha, Mhe. Naano alipendekeza uanzishwaji wa maabara moja ya sayansi kwa shule za sekondari kwa kila mwaka pamoja na uanzishwaji wa shule moja ya bweni ya wasichana.

Kuhusu suala la uwajibikaji wa baraza na watumishi Mhe. Naano aliwataka kwa pamoja kubuni njia na mikakati endelevu katika kuwaendeleza Wananchi kiuchumi.

“ Shughulikieni vipaumbele kama vilivyoelezwa kwenye ilani ya uchaguzi kama kulinda na kuimarisha usawa na utu, kuimarisha uchumi wa kisasa na kuleta mageuzi ya kilimo cha kisasa”. Alisema Mhe. Naano.

Baraza la madiwani linaundwa na jumla ya madiwani wa kuchaguliwa 16, viti maalum 6 pamoja na mbunge wa jimbo ambapo kati ya madiwani 23, madiwani 20 wanatokana na Chama Cha Mapinduzi na Madiwani wawili kutoka Chama Cha Demokrasia na Maendeleo.