WANAFUNZI 11 WAREJESHWA KUENDELEA NA MASOMO MANISPAA YA MUSOMA

Imewekwa: July 30th, 2025

Kamati jumuishi ya wilaya ya Kurejesha wanafunzi walioacha shule (DSIATs) Halmashauri ya Manispaa ya Musoma imefanikiwa kuwarejesha shuleni jumla ya wanafunzi 11 kati ya 32 waliokuwa wameacha (Dropout) kwa sababu mbalimbali.

Jitihada za kuwarejesha wanafunzi hao zimefanywa kwa ushirikiano mkubwa kati ya kamati ya DSIATs, wazazi na walimu katika shule mbalimbali za msingi katika Manispaa ya Musoma.

Akieleza mafanikio ya kamati jumuishi ya wilaya ya kurejesha wanafunzi walioacha shule, mjumbe kamati ndugu Edwin Nyaoko amesema takwimu zinaoneshakuwa jumla ya wanafunzi 32 walidondoka kuendelea na masomo ambapo kati ya hao wanaume walikuwa 15 na wanawake 17.

Ndugu Nyaoko ameongeza kuwa wanafunzi walioacha shule katika vipindi tofauti wanatoka katika shule 10 za msingi.

Amezitaja shule hizo kuwa ni pamoja na Kambarage A, Musoma, Iringo B, Nyang’ombori, Kigera B, Kwangwa, Kamunyonge A, Nyarigamba B, Azimio na Rwamlimi B.

Aidha, ndugu Nyaoko ameendelea kueleza kuwa kamati ilibaini kuwa wanafunzi watano hawakuacha shule isipokuwa wakihamishwa kiholela bila kufuata taratibu za uhamisho kutoka shule mama.

Kuhusu sababu za wanafunzi hao kuacha shule ni pamoja na wazazi/ walezi wa Watoto hao kuachana na wazazi kuhama makazi kwa sababu mbalimbali.

Kamati ya DSIATs inaendelea na jitihada za makusudi kuhakikisha wanafunzi wote walioacha shule wanarejeshwa shule kuendelea na masomo.