Wananchi wahimizwa kushiriki kikamilifu Sensa ya watu na makazi

Imewekwa: June 4th, 2022

Wananchi wahimizwa kushiriki kikamilifu Sensa ya watu na makazi

Mkuu wa wilaya ya Musoma Mhe. Dr. Khalfany Haule ametoa wito kwa Wananchi wote wa Manispaa ya Musoma kushiriki kikamilifu katika zezi la sensa ya watu na makazi linalotarajiwa kufanyika tarehe 23 Agosti mwaka huu

Halmashauri ya Musoma ni miongoni mwa Halmashauri nchini ambazo zitashiriki katika zoezi la sensa ya watu na makazi ambapo katika sensa iliyofanyika mwaka 2012 Manispaa ya Musoma ilikuwa na watu zaidi ya 134,000

“Niwaombe kuhusu zoezi la sensa ya watu na makazi, elimu zaidi iendelee kutolewa ili kila mwananchi ashiriki kikamilifu” Alisema Dr. Haule

Tofauti na mazoezi mengine ya sensa yaliyotangulia zoezi la mwaka huu litafanyika kwa ufanisi zaidi huku dhana ya sensa ya watu na makazi ikionekana kwa uhalisia zaidi.

Hii ni kutokana na juhudi za makusudi za serikali ya awamu ya sita katika kukamilisha operesheni ya anuani za makazi nchi nzima zoezi lililolenga kupata takwimu sahihi za makazi na anuani yanakopatikana makazi hayo.

“ Zoezi la Sensa mwaka huu linategemewa kuwa na ufanisi mkubwa kutokana na serikali ya awamu ya sita kuchukua hatua za makusudi kukamilisha zoezi la anuani za makazi ambalo kwa sehemu kubwa litasaidia katika ufanisi wa zoezi la sensa mwaka huu” Alisema Dr. Haule.

Dr. Haule amesisitiza kuwa maandalizi yote muhimu ikiwa pamoja na ulinzi na usalama yaendelee kufanyika ili kusaidia zoezi hili kufanyika kwa Amani na usalama.

“Kamati za Ulinzi na Usalama za Kata na Mitaa zikae na kujadili masuala ya kiusalama, pamoja kuwapa ushirikiano wa kutosha polisi jamii” Aliongeza Dr. Haule.

Kwa upande wake Mstahiki Meya wa Manispaa ya Musoma Mhe. William Gumbo amempongeza mkuu wa Wilaya kwa juhudi zake na maelekezo anayoyatoa mara kwa mara kwa Halmashauri ambayo yamesaidia kwa kiwango kikubwa mafanikio yanayoonekana sasa.

“Nikuhakikishie Mhe. Dc kuanzia sasa wimbo wetu utakuwa sensa, sense,sense na niwatake watumishi wetu wafanye kazi kwa maarifa yote ili kukamilisha azma njema ya serikali yetu” Alisisitiza Mhe. Gumbo

Zoezi la sensa ya watu na makazi hufanyika kila baada ya miaka kumi ambapo takwimu mbalimbali hukusanywa ili kuisaidia serikali kupanga mipango yake ya maendeleo kwa kuzingatia vigezo mbalimbali ikiwa ni pamoja na idadi.