Mazingira Day Butiama

Posted on: June 4th, 2017

Maadhimisho ya siku ya Mazingira kitaifa yaleta Neema Mara

Serikali imeahidi kuutunza msitu wa Mhunda uliopo kijiji cha Butiama mkoa wa Mara msitu uliopandwa na Baba wa Taifa Mwl. Julius Nyerere imefahamika.

Akihutubia katika kilele cha maadhimisho ya siku ya Mazingira duniani yaliyoadhimishwa kitaifa mkoa wa Mara wilaya ya Butiama, makamu wa rais mhe. Samia Suluhu Hassan alisema kuanzia sasa serikali itachukua hatua madhubuti katika kuuhifadhi msitu wa mhunda.

Alisema serikali imekuwa mstari wa mbele katika kuhifadhi mazingira na kutoa wito kwa wananchi wote kuhakikisha mazingira yanatunzwa kwa manufaa ya maendeleo ya sasa na baadae.

Akielezea kauli mbiu ya dunia katika kilele cha maadhimisho hayo Mhe. Samia alisema dunia mwaka huu inatoa ujumbe mzito kwa wakazi wa dunia kwa kuwakumbusha kuunganika na mazingira kama nyenzo muhimu katika kuwaletea maendeleo na kuishi salama.

“Uchafuzi wa mazingira unatishia uhai wa wakazi wote wa dunia,kwa kuwa mazingira yanaendelea kuchafuliwa kwa kasi kubwa. Vilevile, tumeshuhudia siku za karibuni mito,visima na viumbe vya majini vikipungua kutokana na uchafuzi wa mazingira” alisema.

Aliongeza kuwa ” Serikali imejipanga ipasavyo kuhakikisha hali ya uchafuzi wa mazingira inadhibitiwa na ndio maana serikali imeamua kwa kuanzia kuutunza msitu uliopandwa na mwl. Nyerere”.

Aidha Mhe. Samia alisisitiza kuwa srea ya serikali ya awamu ya tano ya Tanzania ya viwanda kamwe haiwezi fikiwa ikiwa utunzaji wa mazingira hautazingatiwa na kupewa msukumo na wananchi wote.

“Nawaagiza wakuu wote wa mkoa na Wilaya kuhakikisha kila mwaka wanapanda miti isiyopungua milioni 1.5 ili kurudisha mazingira katika hali nzuri” Alisema.

Maadhimisho ya siku ya mazingira duniani huazimishwa kila mwaka tarehe 05 mwezi wa sita ambapo mwaka huu maadhimisho yalifanyika mkoani Mara wilaya ya Butiama.