Dc musoma ataka ubunifu katika uanzishaji wa miradi ya kuongeza kipato

Posted on: September 8th, 2022

DC Musoma ataka ubunifu katika uanzishaji wa miradi  ya kuongeza kipato

Mkuu wa wilaya ya Musoma Dr. Khalfany Haule amewaomba viongozi wa Manispaa ya Musoma wakiwemo madiwani kujenga mahusiano mazuri na wananchi lengo ikiwa ni kutengeneza na kutekeleza mipango ya maendeleo ndani ya Manispaa ya Musoma.

Akizungumza kwenye mkutano wa Baraza la Madiwaniuliofanyika  jana ndani ya ukumbi wa Manispaa ya Musoma, Dr Haule alilitaka baraza la madiwani kujidhatiti katika kubuni na kuanzisha miradi mikubwa ya mapato itakayoiingizia mapato Halmashauri.

"Ni wakati sasa wa Manispaa yetu kubuni miradi mbalimbali ya Maendeleo ikiwemo sehemu za michezo ya watoto, sehemu nzuri ya kupumzikia, vilevile kubuni viwanda vidogo vidogo vya kutengeneza bidhaa ikiwemo chupa za dripu za maji zitakazotumika kwenye vituo vya Afya lengo ikiwa ni kuondokana na gharama zisizo za lazima za kuagiza vifaa kutoka sehemu nyingine na pia kutengeneza fursa kwa vijana ndani ya Manispaa " alisema Dr Haule.

Kwa upande mwingine Dr. Haule ametoa salamu kutoka serikali kuu, akiwashukuru viongozi wa manispaa ya musoma kwa utekelezaji mzuri wa zoezi la sensa lililofanyika kuanzia tarehe 23/08/2022 kwani zoezi limefikia asilimia mia moja  na malengo yametimia, kwa upande wa majengo ilikadiriwa kufikia 38000 lakini majengo zaidi ya 39000 yamehesabiwa.

Mkutano wa kawaida wa baraza la madiwani ulikutana kujadili taarifa za utekelezaji wa shughuli mbalimbali za Halmashauri zilizofanyika robo ya nne yam waka wa fedha 2021/2022.