Observe Professionalism -Mayor

Posted on: May 17th, 2018

Watumishi wa Halmashauri ya Manispaa ya Musoma wametakiwa kufanya kazi kwa weledi bila kusubiri kupangiwa kazi na wasimamizi wao ili kuongeza tija katika utendaji wa taasisi.

Hayo yalisemwa jana na Mstahiki Meya wa Manispaa Capt. William Gumbo wakati wa mkutano wa Baraza la Madiwani ulioitishwa kujadili taarifa za utekelezaji robo ya tatu ambapo amezitaka idara zote zenye miradi viporo kuhakikisha zinakamilisha miradi hiyo kwa wakati.

Capt. Gumbo amesisitiza uwajibikaji unaotoa matokeo na kuondokana na utamaduni wa kufanya kazi kwa mazoea hali inayohafifisha ufanisi katika utendaji wa Halmashauri.

“Wakuu wa idara wote wenye miradi hakikisheni ifikapo Juni 30 fedha za miradi zinatumika kukamilisha miradi yote, bila kuathiri sheria na taratibu za matumizi ya fedha hizo.”Alisema Capt. Gumbo

Aidha, Capt. Gumbo aliwasisitiza watendaji wote kushirikiana kwa karibu kwa wakati uliobaki kabla ya mwaka wa fedha kwisha kukusanya mapato ili kufikia lengo la makusanyo Halmashauri ililojiwekea.

Katika hatua nyingine Capt. Gumbo ameeleza kuwa baraza la madiwani limewachukulia hatua za kinidhamu watumishi watano kati ya sita waliofikishwa mbele ya kamati ya madiwani kwa makosa mbalimbali ya kiutumishi.

Hatua ya kinidhamu iliyochukuliwa kwa watumishi hao ni onyo la maandishi baada ya kupatikana na hatua katika mashtaka yaliyokuwa yakiwakabili.

“Kuna baadhi ya watumishi  wanaokiuka kanuni za utumishi, wengine imefikia hatua wanadhalilisha utumishi wa umma. Kwa mfano kuna mtumishi mmoja ni mlevi mpaka inafikia hatua analewa na kuweka koti lake rehani, hatuwezi kuendelea na watumishi kama hawa. Tayari nimemuagiza Mkurugenzi kuanza taratibu za kumfungulia mashtaka ya kiutumishi kwa hatua za kinidhamu kuchukuliwa dhidi yake.” Alisema Capt. Gumbo.

Baraza la Madiwani limelidhia mapendekezo ya ongezeko la gharama za matibabu kutoka shilingi 2000 hadi shilingi Tsh. 5000 kwa wagonjwa wasiotumia Bima katika vituo vya Afya na Zahanati zote za Halmashauri ya Manispaa ya Musoma.