Musoma Municipal vows to raise education quality, Economy to its Citizens

Posted on: February 12th, 2021

Manispaa ya Musoma kujielekeza kuinua Elimu, Uchumi kwa wakazi wake

Halmashauri ya Manispaa ya Musoma imeshauriwa kuweka kipaumbele katika sekta ya elimu kwa kuimarisha miundombinu ya elimu kama ujenzi wa madarasa, utengenezaji wa madawati pamoja na walimu.

Mbunge wa jimbo la Musoma Mhe. Vedastus Manyinyi Mathayo ameliambia baraza kuwa ni wakati sasa Halmashauri kufikiri kwa kina namna ya kutatua changamoto zinazokabili sekta ya elimu katika Manispaa ya Musoma.

Mhe. Mathayo pia ametoa rai kwa madiwani wakishirikiana na wataalamu kubuni namna nzuri ya kuinua kipato cha wakazi wa Musoma kwa kujenga mazingira wezeshi yatakayochochea ukuaji wa shughuli za uchumi na kuwaletea Wananchi ahueni.

“Musoma tumejaliwa kuwa na ziwa Victoria, ni muhimu kufikiria matumizi sahihi ya ziwa kwa kutengeneza mkakati wa kuboresha shughuli za uvuvi, “ alisema Mhe. Mathayo.

Aidha, Mhe. Mathayo alisema suluhu ya kuongeza mzunguko wa fedha katika Manispaa ya Musoma ni kuongeza eneo la utawala mkakati ambao unaendelea kushughulikiwa na mamlaka nyingine za serikali.

Kwa upande wake Mstahiki Meya wa Manispaa Mhe. William Gumbo amesisitiza umuhimu wa idara mbalimbali kuanza kutafuta namna bora ya kuongeza tija katika shughuli zao.

Mhe. Gumbo amesema “ Idara ya maendeleo ya jamii kuanzia sasa itumike katika utoaji elimu katika miradi na mipango mbalimbali ya jamii, vilevile idara yak limo itafute maeneo ya kilimo na kuhamasisha vijana kujihusisha na uzalishaji wa mazao yenye tija”.

Baraza la madiwani limekamilisha mkutano wake wa robo ya pili kwa kujadili na kupitisha taarifa za utendaji za kamati za kudumu pamoja na maazimio mbalimbali kutoka serikali kuu.