Im Satisfied by your Devotion - Mayor

Posted on: February 15th, 2021

Naridhika na Utendaji Wenu – Meya

Mstahiki Meya wa Manispaa ya Musoma Mhe. William Patrick Gumbo amewapongeza watumishi wa Halmashauri kwa kazi nzuri wanayoifanya kuwahudumia wananchi katika utekelezaji wa majukumu yao.

Mhe. Gumbo ameyasema hayo wakati wa uzinduzi wa baraza la wafanyakazi lililofanyika katika ukumbi wa Halmashauri.

Akilihutubia baraza hilo, Mhe. Gumbo aliwaasa wawakilishi wa watumishi wanaounda baraza hilo kuwa wakati umefika baraza la wafanya kazi litumike kuongeza tija na kupanga malengo ya maendeleo ya Halmashauri.

“Mara nyingi sisi wanasiasa tunapenda kuona matokeo,” Alisema Mhe. Gumbo.

Aidha, Mhe. Gumbo aliwakumbusha watumishi mafanikio ya Halmashauri kwa miaka mitano iliyopita ambapo Halmashauri ilipata tuzo mbalimbali kwa utendaji uliotukuka kutoka baraza la famasia na maonesho ya Nane Nane yaliyofanyika kitaifa Mkoani Simiyu.

“Suala la ubunifu katika utendaji wenu ni muhimu, fanyeni mambo ya ziada yatakayoacha alama,” Alisisitiza Mhe. Gumbo.

Aliwataka watumishi kuongeza maarifa katika kuzikabili changamoto na kuongeza kuwa “Ni matumaini yangu kuwa mwisho wa baraza hili mtakuja na michango mizuri pamoja na mapendekezo thabiti”.

Mhe. Gumbo pia alitoa tahadhali kwa wajumbe wa baraza la wafanyakazi kwa kuwataka kuitisha vikao katika idara na vitengo vyao, uharaka wa utoaji huduma kwa wakati pamoja na kuzingatia huduma kwa wateja.

“Tuwe na lugha nzuri kwa wateja pamoja na weledi,” Aliongeza Mhe. Gumbo.

Awali akimkaribisha mgeni rasmi kuzindua baraza la wafanyakazi, mwenyekiti wa baraza Bi. Fidelica Myovella ambaye pia ni Mkurugenzi wa Manispaa alisema kuwa baraza linalozinduliwa litahudumu kwa muda wa miaka mitatu.

Bi. Myovella alisema baraza la wafanyakazi lina jukumu kubwa kuhakikisha masuala muhimu ya wafanyakazi yanapewa msukumo kutokana na uwakilishi wa watumishi katika kila idara na sekta katika Halmashauri ya Manispaa.

Bi. Myovella alidokeza kuwa kazi kubwa baada ya uzinduzi wa baraza itakuwa kujadili na kupitisha mpango na bajeti ya Halmashauri kwa mwaka wa fedha 2021/2022.

Kabla ya uzinduzi wa baraza kulifanyika uchaguzi wa viongozi wapya wa baraza kwa mujibu wa mkataba wa baraza ambapo Bi. Aines Anderson alichaguliwa kuwa katibu mpya wa baraza huku Ndugu Benedict Balole akichaguliwa kuwa katibu msaidizi.

Baraza la wafanyakazi linauhishwa baada ya baraza lililokuwepo kukamilisha muda wake.