RC Envisions New Musoma

Posted on: June 14th, 2018

Mkuu wa Mkoa wa Mara Mhe. Adam Kigoma Malima amelitaka baraza la Madiwani kutekeleza wajibu wake wa kuisimamia Halmashauri kwa kuweka mbele agenda ya maendeleo ili kufukia malengo.

Mhe. Malima ameyasema hayo alipokuwa akilihutubia baraza la Madiwani katika mkutano maalum wa kujadili hoja za ukaguzi uliofanyika jana katika ukumbi mkuu wa Manispaa ya Musoma.

Mhe. Malima amesisitiza kuwa Manispaa ya Musoma lazima ibadilike and kuongeza kuwa ili kufikia maendeleo lazima viongozi na wataalam wajiulize maswali magumu yatakayopelekea kupata suluhisho la changamoto zinazokabili ukuaji wa Manispaa.

Aidha, alitahadhalisha kuwa bila kubadilika Musoma itakuwa Mji wa mwisho miaka michache ijayo.

“Maendeleo yana kazi kubwa, hapa ni ‘capital city’, ninyi ni wajanja tuzungumze basi mambo ya maendeleo”. Alisema Mhe Malima.

Pamoja na kuibadili Musoma kwa mtizamo wa maendeleo aliwataka madiwani wasimame kwenye kilele cha ukweli na haki ili kusimamia kwa ufanisi shughuli zote za maendeleo katika Manispaa.

Kuhusu Uwajibikaji wa Mashirika ya Umma

Mhe. Malima aliweka wazi dhamira yake ya kuyasimamia mashirika na taasisi zote zilizo chini yake na kuzitaka kuzingatia misingi ya uwajibikaji na weledi.

Mhe. Malima aliitolea mfano Mamlaka ya Maji na Usafi wa Mazingira(MUWASA) ambayo haikuwa na utendaji wa kuridhisha hatua iliyopelekea kuvunjwa kwa bodi yake na kusimamishwa kwa baadhi ya watendaji.

“Simuombi mtu radhi kwa MUWASA kwa sababu ndilo shirika langu nyeti, nikiona uozo lazima niseme, kuna watu nimewashika kubaya” alisema na kuongeza “ Na mimi nawajua wapigaji, nimewashika pabaya, siombi msamaha kwa jambo lililo kwenda vibaya”. Alisema Mhe. Malima.

“Kuna wabaya wanapeleka maneno kuwa yule jamaa anaondoka muda wowote, waambieni wanapoteza muda. Kila mtu abebe mzigo wake”.Alisisitiza Mhe. Malima.

Mhe. Malima alimtaka  kila anayehusika kuhakikisha anasimamia eneo lake na kuondoa dosari zote za kiutendaji zinazoweza kuleta maswali yasiyo na majibu kwa wananchi.

Uvuvi Haramu

Kuhusu uvuvi haramu Mhe. Malima alisema kuwa adui mkubwa  wa viwanda vya samaki ni uvuvi haramu na kuwataka wote wanaohusika kuacha mara moja vitendo hivyo.

Mhe. Malima aliongeza kuwa kiwanda cha ‘Prime Catch’ kilikuwa kinatoa ajira 700 lakini kutokana na uvuvi haramu samaki walipungua na hivyo uzalishaji wa kiwanda ulishuka hali  iliyopelekea kufungwa kwa kiwanda hicho na ajira kupotea.

“Ukimjua ndugu yako anafanya uvuvi haramu mwambie Mkuu wa Mkoa atabanana nae kila kona”. Alionya Mhe. Malima.

Upanuzi wa Uwanja wa ndege, eneo la Utawala na uwekezaji

Akizungumza kuhusu uwanja wa ndege Mhe. Malima lazima Manispaa ya Musoma iwe na uwanja wa ndege kwa maslahi mapana ya kiuchumi na  kuzihudumia kwa ufanisi rasilimali za hifadhi ya taifa ya Serengeti.

Aliendelea kufafanua kuwa Musoma bila uwanja wa ndege haiwezi kupiga hatua kwa kuwa Musoma ndio pointi ya karibu kufika hifadhi ya Serengeti hivyo uwepo wa uwanja wa ndege utawavutia watalii wengi na fursa nyingine nyingi.

“Tunapozungumza kuhusu musoma lazima tujue tunalo tatizo kubwa.Musoma inazo rasilimali za pekee”. Alisema Mhe. Malima.

Mbali na rasilimali nyingi zilizoko Musoma wawekezaji wengi wamekuwa wakielekea mikoa ya jirani na mara nyingine kuhamisha biashara zao Musoma.

“Nataka wote tujiulize kwa nini watu hawawekezi Musoma?” aliuliza Mhe. Malima na kuongeza kuwa “Lipo tatizo na nawaambieni maneno magumu, makali, ili mjitafakari wenyewe, nyie ndio mliopewa dhamana na wananchi”.

Mhe. Malima alihitimisha hotuba yake kwa kulitaka baraza la Madiwani kuchukua hatua za makusudi kupanua eneo la Utawala la Manispaa kwa kufuata taratibu zote ili kuisaidia musoma kukua na kupata eneo la kupumulia.

“Lazima tukae kama madiwani tuchukue dhamana ya maendeleo ya mji wa Musoma. Nendeni mkaongee na jeshi na Halmashauri za jirani mpate maeneo ya viwanda na uwekezaji”. Alisema Mhe. Malima.

Awali akifunga mkutano wa Baraza la Madiwani Mstahiki Meya wa Manispaa ya Musoma Mhe. William Gumbo alimshukuru Mkuu wa Mkoa kwa  maelekezo na ushauri wake kwa maendeleo ya Manispaa ya Musoma na kuahidi kuchukua hatua kuanzia sasa ili kuibadilisha Musoma.