I have no tolerance left for underpriveledged

Posted on: September 5th, 2018

Siko Tayari  Watanzania Maskini wanyanyasike – Magufuli

Rais Magufuli amewataka viongozi na watendaji wa Serikali kujitathimini katika utendaji wao na kuchukua hatua stahiki katika kuwahudumia wananchi.

Rais amesisitiza viongozi kuweka maslahi ya wananchi mbele na kuondokana na ubinafsi na kutumia vibaya madaraka waliyonayo na kusahau kuwa madaraka hayo yanatokana na wananchi.

Baadhi ya mambo yaliyomsikitisha Rais ni pamoja na kasi ndogo katika kushughulikia kero mbalimbali za wananchi na kutaka hali hiyo ikomeshwe mara moja.

“Madaraka ni ya muda mfupi, lazima viongozi wote wajue hilo. Urais wangu pia ni temporary” Alisema Rais kwa msisitizo.

Rais aliongeza kuwa ikiwa uwajibikaji kwa viongozi utapewa mkazo changamoto nyingi zitatatuliwa bila ulazima wa kumsubiri Rais na kwamba mkoa wa mara kwa asili yake utakuwa umeenziwa.

“Nataka siku moja watu wakija Musoma wajue ndipo mahali alipotoka baba wa Taifa” Alisema Rais.

Viongozi wanatakiwa kujifunza kuwatumikia wananchi na kutatua kero zao.

“Mimi nitaendelea kufukuza hata kama ni kila siku, ili watendaji wafahamu kuwa vyeo walivyonavyo ni dhamana. Ninachofanya ni kata mti panda mti” Alisema Rais Magufuli.

Vile vile aliweka wazi kuwa analojukumu la kuwatumikia wananchi kwa jasho kubwa.

Kwa upande mwingine Rais akijibu ombi la mbunge wa jimbo la Musoma Mjini Vedastus Mathayo kuhusu upanuzi wa eneo la utawala la Manispaa ya Musoma alisema suala hilo lipo ndani ya uwezo wa Manispaa.

“Ni lazima muangalie gharama za upanuzi wa mji wenu. Kupanga ni kuchagua”. Alisema Rais Magufuli.

Rais aliendelea kueleza kuwa upanuzi wa mji upo chini ya mamlaka ya Manispaa kwa mujibu wa sharia na kuitaka Halmashauri kufuata taratibu hizo.

“Hata kama mkitaka kupanua eneo lenu hadi Butiama ni sawa lakini taratibu zifuatwe”. Alisisitiza Rais.

Katika ziara yake katika Manispaa ya Musoma Rais alifungua mradi wa maji eneo la Bukanga, mradi unaokadiriwa kutumia bilioni 51, Ufunguzi wa barabara ya Musoma Simiyu yenye urefu wa km 85.5 pamoja na kutembelea mradi wa ufugaji wa samaki unaofanywa na kikosi cha jeshi la wananchi cha 27 KJ Mkoani Mara.