Wananchi Musoma kufikiwa na huduma ya maji kwa asilimia 100

Posted on: May 26th, 2022

Wananchi Musoma kufikiwa na huduma ya Maji  kwa asilimia 100

Tatizo la muda mrefu la upatikanaji wa uhakika wa huduma ya maji kwa baadhi ya maeneo ya Manispaa ya Musoma limepatiwa ufumbuzi na hivi karibuni huduma hiyo itatolewa kwa zaidi ya asilimia 100 kwa mji wote wa Musoma kufuatia uimarishaji wa miundombinu unaoendelea kufanywa na mamlaka ya Maji safi na usafi wa mazingira (MUWASA).

Hatua hiyo inafuatia usimikaji wa mabomba pamoja na miundombinu mingine katika maeneo yote ya pembezoni mwa mji wa Musoma pamoja na kukamilika kwa ujenzi wa matanki ya maji katika eneo la Balima Kata ya Buhare.

Awali akihutubia mkutano wa baraza la madiwani mkuu wa wilaya ya Musoma Mhe. Dr. Khalfany Haule, aliweka bayana mafanikio makubwa yaliyofikiwa katika kuhakikisha huduma ya maji katika Mji wa Musoma inakuwa ya uhakika na kwa watu wote.

Dr. Haule, amempongeza Rais wa Jamhuri ya Muungano wa Tanzania Mhe. Samia Suluhu Hassan kwa utendaji uliotukuka na nia yake ya dhati ya kuwaletea Wananchi ustawi hasa katika sekta ya maji.

“Sisi sote ni mashahidi Mhe. Rais hana muhari linapokuja suala la upatikanaji wa huduma ya maji, Rais wetu mpendwa amefanya kila linalowezekana kuhakikisha huduma hii muhimu inawafikia Wananchi wote katika mji wetu” Alisema Dr. Haule.

Dr. aliongeza kuwa “ Mwenye macho haambiwi tazama katika muda mfupi ujao Halmashauri yetu itakuwa moja ya Halmashuri ambazo upatikanaji wa huduma ya maji ni zaidi ya asilimia 100 ”.

Aidha, Dr. Haule ameupongeza utendaji wa Halmashauri ya Manispaa ya Musoma katika ukusanyaji mapato pamoja na usimamizi wa miradi ya maendeleo.

“Nasimamia Halmashauri mbili, lakini Halmashauri hii situmii nguvu kubwa katika kuisimamia, utekelezaji wa miradi ya maendeleo ni wa kutia moyo sana” Alisema Dr. Haule.

Upatikanaji wa Huduma ya maji kwa sasa katika Halmashauri ya Manispaa ya Musoma ni asilimia 85.