KAMATI YA FEDHA NA UTAWALA YARIDHIA RASIMU YA MPANGO NA BAJETI YA HALMASHAURI KWA MWAKA WA FEDHA 2026/2027

Imewekwa: January 22nd, 2026

KAMATI YA FEDHA NA UTAWALA YARIDHIA RASIMU YA MPANGO NA BAJETI YA HALMASHAURI KWA MWAKA WA FEDHA 2026/2027

Kamati ya kudumu ya Fedha na Utawala ya Halmashari ya Manispaa ya Musoma leo Januari 22, 2026 imepitisha rasimu ya Mpango na Bajeti ya Halmashauri  ya Manispaa ya Musoma kwa mwaka wa fedha  2026/2027 ambapo jumla ya shilingi 37,426,331,679 zinatarajiwa kukusanywa kutoka vyanzo mbalimbali.

Kutoka chanzo cha mapato ya ndani Halmashauri inakusudia kukusanya shilingi 5,976,956,679 sawa na asilimia 15.97, wakati shilingi 1,563, 059,000.00 sawa na asilimia 4.18 ikiwa ni ruzuku ya matumizi mengineyo toka serikali kuu.

Aidha, Mishahara ya watumishi Halmashauri inakusudia kupata 22,632,972,000 sawa na asilimia 60.47 na miradi ya maendeleo toka serikali kuu na wadau wa maendeleo shilingi 7,253, 344,000 sawa na asilimia  19.38.

Akiwasilisha makadirio ya mapato na matumizi ya mwaka wa fedha 2026/2027 afisa mipango wa Halmashauri ndugu. Samwel Warioba amebainisha kuwa makisio ya bajeti  ya Halmashauri yameongezeka kwa asilimia 0.47 kutoka shilingi 37,252, 114,000 kwa mwaka wa fedha 2025/2026 hadi shilingi  37,426,331,679.00 ya mwaka wa fedha 2026/2027.

Ndugu. Warioba ameongeza kuwa ongezeko hili limechangiwa na kuongezeka  kwa makisio ya michango ya  papo  kwa papo (User fee), michango ya Bima ya Afya(NHIF), michango ya maduka yad awa, kodi ya vibanda, ushuru wa Samaki na dagaa na kuongezeka kwa vyanzo vipya vya mapato ikiwa ni mapato yanayotokana na BASATA, pamoja na ushuru wa mazao na mapato yatokanayo na vizimba.

Katika hatua nyingine Ndg. Warioba amevitaja vipaumbele vya bajeti kuwa ni pamoja na kuongeza usimamizi na ufuatiliaji wa vyanzo vya mapato ya ndani ili kupunguza upotevu na mapato na kuongeza makusanyo ya mapato ya ndani, kuboresha mazingira ya kufanyia kazi kwa kutenga fedha kwa ajili ya ununuzi wa vitendea kazi, kulipa madeni  na stahiki mbalimbali za watumishi katika idara na vitengo na kulips fidia ya maeneo mbalimbali ya wananchi yaliyochukuliwa na serikali kwa shughuli za maendeleo.

Vipaumbele vingine vilivyotajwa na ndg. Warioba kuwa ni kuwawezesha wananchi kiuchumi kupitia asilimia kumi ya mapato ya ndani na mpango wa kunusuru kaya maskini (TASAF), Kuboresha mazingira ya kufanyia kazi katika ngazi za msingi( Kata na Mitaa), kuhifadhi na kupambana na changamoto za uharibifu wa mazingira katika Halmashauri pamoja na kuboresha mazingira ya kufundishia na kujifunzia kwa kutenga bajeti kwa ujenzi wa miundombinu ya kujifunzia.