MSTAHIKI MEYA ASISITIZA UWAJIBIKAJI KWA WATUMISHI

Imewekwa: January 15th, 2026

Mstahiki Meya wa Manispaa ya Musoma Mhe. Alex Mtake Nyabiti amefanya kikao cha pamoja na timu ya menejimenti ya Manispaa ya Musoma. Kikao hicho kimefanyika katika ukumbi wa Halmashauri ya Manispaa ya Musoma leo January 15, 2026.

Mhe. Nyabiti ameambatana na naibu Meya wa Manispaa Mhe. Haji Mugeta Mtete pamoja na wenyeviti wa kamati za kudumu za Elimu, Afya na huduma za uchumi  Mhe. Amina Masisa  na mwenyekiti wa kamati ya Mipango Miji na Mazingira Mhe. Naima Minga

Mhe. Nyabiti amesisitiza ushirikiano na kuwataka wakuu wa idara na vitengo kufanya kazi kwa kasi na weledi ili kuendeleza kazi nzuri iliyofanywa na uongozi uliopita.

Aidha, Mhe. Nyabiti amesisitiza kuwa muda wa kufanya kazi kwa mazoea umefika mwisho na sasa kila mtu anatakiwa kubadili namna ya kufanya kazi na kuongeza kasi ili kuwafikishia wananchi huduma bora.

Kikao hiki kimekusudia kuongeza motisha kwa watumishi na kuwakumbusha wajibu wao katika utoaji wa huduma stahiki kwa wananchi.

Kwa upande wa wataalam Mkurugenzi wa Manispaa ya Musoma Ndugu. Bosco Ndunguru amemshukuru Mstahiki Meya kuwa maelekezo yote aliyoyatoa yatafanyiwa kazi na kuahidi kuwa kwa kushirikiana na timu ya menejimenti watahakikisha kasi ya utendaji inaongezeka na kuhakikisha huduma zote zinazotolewa na Halmashauri zinaboreshwa na kukidhi matarajio ya wananchi.